“Xəzər Lənkəran”ın kapitanı Rahid Əmirquliyev yubiley oyununu keçirəcək. 26 yaşlı yarımmüdafiəçi  Premyer Liqada 250-ci dəfə “ağ-yaşıllar”ın formasını geyəcək. Bu, Topaz Premyer Liqasının XIV turunun “Zirə” ilə səfər qarşılaşmasında gerçəkləşə bilər. İndiyədək komandamızda hamıdan çox – 314 qarşılaşma keçirən orta sahə oyunçusu 249 dəfə çempionat görüşündə iştirak edib. Əmirquliyevin digər oyunları avrokuboklara, Birlik kuboku, Superkubok və ölkə kubokuna təsadüf edib. Komandamızdakı 10-cu mövsümündə 250-yə çatacaq kapitan bu qarşılaşmalarda 23 qol vurub, 43 sarı vərəqə alıb. Onun 2006-cı ilin yayında keçdiyi “Xəzər Lənkəran”da debütü 2006/07 mövsümünə təsadüf edib. O, avqustun 11-də “Xəzər Lənkəran” mərkəzi stadionunda “Neftçi”yə qarşı keçirilən matçın 78-ci dəqiqəsində oyuna daxil olub. Bunadək Qusar “Şahdağ”ında çıxış edən yarımmüdafiəçi ümumilikdə Premyer Liqada 306 qarşılaşma keçirib.